ذنوب الأسئلة !

صعبه عليك تبوح بحاجتك
وتصفع قلبك كرامتك!
اللي وقفت بوجهك كثير
لكن الألم في داخلك
أقوى من تجاهلك
يارب هل القاسي يحس؟!
هل الحياة عنده لها معنى وحس؟
هل هو يشوف الحمول
اللي على ظهر الضعيف!
هل هو بحاله يمكن يروف؟!
هل وهل ويا كثر الأسئلة
اللي وقفت غصة وجروح
في قلب إنسان
مافارقه الخذلان
معانقه في كل حين
يا عابرين في هالحياة
أنا كرهت الأسئلة
كرهت ليه ومتى وكيف؟!
كرهت الظنون المرهقة
كرهت أمشي في درب معتم
وقلبي ضرير وعيني ماتبصر
إلا الوجع من كل صوب
كنه شمس النهار لامن سطت
على ظلال الدروب
ومال الشجر عنها بحزن
ينتظر ساعة غروب
كرهت قلوب ما تعطي إلا الذنوب!
سود نواياها وما تهدي إلا نكران وجحود
ياهل ترى في هالمدى فُسحة أمل؟!
تبدد الهم الساكن وسط الحشى
اللي تعبت منه الحروف
تبي سما ياسعها بليا خوف
ياهل ترى بعانق حياة
ما فيها عناوين لدرب العنى؟!
ياهل ترى باقي سؤال
ما صفع بوحي وبدد غيوم الفرح
اللي غفت على صدر الجراح
وطووولت في رقادها!
يمكن تصحى في نهار وأهنأ بها
ويمكن أموت من الأسى في دروب انتظارها.
http://www.alraimedia.com/Article.aspx?id=482223&date=04122013
http://www.alraimedia.com/Resources/PdfPages/AlRAI/59C38E1F-9779-4D86-89B2-A7C56DC8DBA1/P32.pdf