وش نهاية هالأسى...؟!

في دروب الانتظار
صرخت بشبيهك
انت وينك
قمت أشوف الناس انت
يا جفاك... انت وينك
ما كفاك أني أحتريك
وكل لهفة بخاطري
تنتظر مصافح يديك
وانت تسرف بالغياب
وما تبي طاري العتاب
يا قساك...
ويا وجع انتظاري
المسافة تشهد احتضاري
والرجوع وين الطريق
تاهت فيني الدروب
وصرت ألمح في وجيه العابرين
خيبات وحزن وضحكات الأنين
ومضى هالعمر انتظار
يتلحف البرد وليله يطول
وما ينول إلا سراب
يلمحه من بعيد
ويصافحه فجر جديد
ويبقى مع حزنه وحيد
ويغفى وفي عينه دمع عنيد
ويا انتظار المسافة
ويا وجع هالرجوع
ما بقى في الوقت
وقت للأسى والخضوع
مل الصبر من صبري
واشتكيت وبكيت
وهلت عبرتي وحكيت
وما لقيت لصوتي صدى
غير حزن يصرخ بي كفى
وحرف ينزف الدمعة ألم
وقلم حاير بين السطور
يتأمل ويكتب في ذهول
وش نهاية هالأسى؟!
إلا وش بداية هالقسى؟!
درب موجع
وسكة انتظار
وزهر يذبل
ولحظات انكسار
ووقت وعمر ما يعود
وديمة تتلاشى وما تجود
وخيبات تتوالى وبـ ازدياد
كنها عاذل وقلب حسود
وأشياء صعب تنحكى
من قساها تبكي الصخر الجمود.

http://www.alraimedia.com/Article.aspx?id=419412&date=09032013

http://www.alraimedia.com/Resources/PdfPages/AlRAI/03849574-C0D9-4159-80F6-93A658EC40D2/P15.pdf